شنو هوما الأسباب لي كتخليك كتفيقي عيانةصباح 🌄
مقدمة:
واش حتى نتي كتفيقي الصباح عيانة بحالي؟ كنتكنفيق مع 8 سوايع ديال النعاس وكنحس راسي مزال ناعسة ومقلقة. وكنت كنقول "راسي مريض ولا عندي فقر دم". حتى نهار وقفت مع راسي ولقيت أنا اللي كنت كنخربق روتيني الصباحي بيدي.
ملي بدلت 3 حوايج بسيطين، والله العظيم نهاري تبدل 180 درجة. اليوم غادي نشاركهم معاك باش حتى نتي ترتاحي.
1.الخطأ الأول: القهوة فالدقيقة الأولى
كنت كنوض من الفراش نجري للكوزينة نشرب قهوة. وكنظنها هي اللي غادي تفيقني. ولكن سمعت واحد الدكتور كيقول الجسم ديالنا كيفرز واحد الهرمون سميتو الكورتيزول الصباح بوحدو، وهو اللي كيفيقنا طبيعياً. ملي كنشربو القهوة دغيا، كنخربقو هاد الهرمون ومن بعد مع 11 كنطيحو كاملين.
الحل ديالي دابا: كنستنى ساعة مور ما نفيق عاد نشرب القهوة. فهاد الساعة كنشرب غير كاس ماء. والفرق؟ الطاقة ديالي ولاات ثابتة طول النهار.
2. الخطأ الثاني: التلفون هو أول حاجة
بصراحة كنت كنحل عيني ويدي كتمشي للتلفون ديريكت. إنستغرام، واتساب، أخبار... دماغي كيتخلع . ومنين كنبدا نهاري بالتوتر ديال الناس، طبيعي نكملو مقلقة.
الحل ديالي دابا: التلفون محرم عليا فأول 20 دقيقة. أول حاجة كنديرها هي نحل الشباك وندير 3 تنفسات عميقة، ونشرب كاس ماء بارد. كنحس راسي ملكة 😄
3. الخطأ الثالث: الفطور ديال "صاف غير شي حاجة"
ياما فطرت كرواصة ولا بيسكوي مع القهوة وقلت صافي. ولا كنت كنخرج بلا فطور نهائياً. والنتيجة؟ مع 11 الصباح كنحس بالدوخة والجوع وكناكل أي حاجة قدامي.
الحل ديالي دابا: فطور فيه بروتين. بيضة مسلوقة، ولا شوفان بالحليب، ولا حتى زلافة ديال دانون بالعسل. حاجة خفيفة ولكن كتشبع وكتعطي طاقة حقيقية.
الخلاصة:
ماشي ضروري نبدلو حياتنا كاملة باش نحسو بفرق. غير هاد 3 حوايج الصغار بدلو ليا نهاري كامل.
جربيهم نتي لمدة 3 أيام وقولي لي فالتعليقات شنو حسيتي. و شنو الخطأ اللي كطيحي فيه كل صباح؟ أنا كنقرا كل التعليقات ❤️
جميل
ردحذف